梁振英為「689」、狼英稱呼及被指涉UGL貪腐而出律師信畀《蘋果》單嘢，露出了死穴。
目前商界及ABC陣營花生友有兩種揣測：一是689曲線宣佈去馬角逐連任，故技重施，趁北京未有最後劇本前「撞閘」，製造既定事實，反客為主。二是為起飛清除跑道上的障礙物，近期香港市面僅餘幾件梁粉如「高佬陳」、劉炳章、哼哈二將志剛與煒光紛紛出動為689造勢，一邊大數施政成就，另一邊就公開表示挺梁連任，律師信事件應該是選舉工程一部份。收取UGL 5,000萬是689連任軟肋，封律師信其實並非志在告《蘋果》，因為法律上根本唔知可以告邊一忽，而係借信件向公眾及北京再次表明UGL事件不涉貪腐！如果大家記得ICAC李寶蘭去職那場廉政風暴，及早前港區人大兼審查貪污舉報諮詢委員會主席譚惠珠表明當下任特首條件係不得受貪污調查，可見UGL事件正是689連任最大障礙。ICAC雖經歷大地震，但災後至今仍未表示調查完畢，689如坐針氈，因為ABC陣營一定會向北京狂篤背脊。既然689無法借ICAC把口為自己洗脫，惟有出律師信，猶如當年《紐約時報》爆溫總家人涉貪大鑊，黨冇為佢澄清，惟有自己出信。
若果非建制派識得睇，立法會復會時唔好咁快辯論引用特權法，因為一舉手輸咗，689就冇後顧之憂，當正自己清白，但若果佢入咗閘先至在立法會動議引用P＆P，一旦有另一位建制派如曾鈺成角逐，咁就好大機會過到，689到時點樣選？今屆要兇走其他挑戰者，已經唔係咁容易，自由黨已經同西環公開決裂，因西環介入鄉事內訌嚴重，民建聯大佬曾主席亦講過，如果冇人敢去馬，佢會上陣。當年老董連任，北京可以成功勸退其他挑戰者，因為當時建制陣營仍然未分裂，而北京對香港事務由曾慶紅、廖暉一條鞭落，冇其他人可以左右大局。
北京硬挺梁特 加深建制分裂
其實從目前形勢睇，689根本冇政治能量去角逐連任，一來佢能人所不能，搞到建制四分五裂，如何能夠攞到689票？如果北京及中聯辦硬來迫建制派選委投689，其政治後果只會進一步加深建制分裂。從傘兵姚松炎攻陷建築及測量界可見，ABC在12月選委選舉中，會是主流。北京若堅持挺梁，12月選委選舉，建制派將面臨今年第二次敗績，在選委會內力量比上屆更加倒退，特首選舉更添變數。
二來佢民望長期低殘，五年前689用負面選舉工程搞死唐英年，但佢同時得到《明報》及一棚離地學者之助，在民調中領先唐英年，這是他一大優勢。但今次肯定再冇社會意見領袖願意當梁粉，加上橫洲事變後，689連唯一政績工程也宣告幻滅，記者會上哽咽效果適得其反，建屋不達標，公屋要四年先上樓，所有承諾以走數告終，若非忠心黨員及古惑仔，香港有頭有面者邊個仲會挺梁！
梁連任其管治基礎會比今天更加薄弱，北京若硬挺，梁政權就越弱，連組班都會成問題，屆時西環越強勢，而港獨分離就更加迅速擴散。
添馬男