史雲斯喺上周六英超又輸，睇嚟傑斯即將會接替古杜連，正式坐正做領隊嘅日子都不遠矣。當年同傑斯喺英超經常交手嘅另一位名將、前利物浦隊長謝拉特，據講到11月同洛杉磯銀河約滿後有機會回流英格蘭，仲已經考定教練牌準備返嚟大展拳腳。𠵱家英超幾位領隊帥位都危危乎，謝四隨時趕得切返去睇吓有冇筍工啱做喎。
銀河未傾續約
神奇隊長喺上年離開利物浦，轉投美職聯洛杉磯銀河，佢同銀河嘅合約到11月屆滿，球會方面都未表示想續約，謝四話可能到時選擇退休：「要繼續踢定到此為止，現階段我仲未確實到。我仍然好享受作為球員去比賽，如果有機會可以再踢半年或者一年，我當然會考慮吓；不過如果冇offer，我就會去完成埋個教練牌，睇下之後有乜路可以試吓。我已經完成咗大約60%嘅教練課程，預計年尾會畢業攞到A級牌照。」
今季美職聯常規賽已進入尾聲，銀河啱啱喺上周六場聯賽作客0:1不敵FC達拉斯，不過𠵱家踢咗32場聯賽後已經提早攞到季後賽席位。季後賽由10月尾開打，到12月10日上演決賽，換言之如果銀河唔打算同謝拉特續約嘅話，謝四最遲到12月就會回復自由身，預計到時亦已經攞到教練牌，大可返嚟英格蘭睇吓有冇執教機會。
傑斯快坐正教天鵝
謝四喺利物浦出身，幾乎全個職業生涯都喺紅軍度過，如果佢要謀求一官半職嘅話，照計最正路就係返去母會，跟高路普學吓嘢都係唔錯嘅選擇。今季英超踢咗七輪比賽，唔少球隊都已經陷入困境，史雲斯喺上周六再輸畀利物浦之後，睇嚟傑斯接替古杜連已經指日可待，而新特蘭同韋斯咸等球會都有易帥可能性（見另文）。另外，英格蘭國家隊喺上星期突然要易帥，博彩公司開出下任正式領隊人選賠率，謝四都有份，不過賠率冷到有100倍，有得買都係得啖笑。
當然，踢得好唔代表教得好，同謝四同一代嘅利物浦同英格蘭國家隊隊友，唔少都做過教練，但成績多數都係一般（見附表），如果謝四真係要踢而優則教，我求大俠就先祝佢好運。