呢排中聯辦好頭痕，日日俾《成報》窮追猛打，係咪出事鳥？相信暫時都冇人知，而無論將來西環會點，醫肚都好重要！
嗱，西環高層出席官式活動，八方都見得多，但未必有人諗過，佢哋會隨時出現喺大家身邊，同普通市民一齊喺超市掃貨。八方同事前日、即係10月1日約11點半，約莫喺中聯辦主任張曉明「表演」完落雨收遮唱國歌後，途經西環一間超級市場時，竟然遇上中聯辦副主任殷曉靜。當時所見嘅殷曉靜身穿套裝，喺超市內對做緊特價嘅雲吞大感興趣（圖），親自向店員查詢後，低頭沉思咗一輪，最終忍唔住出手嘞，買走兩盒總值$43.5嘅「上海大餡餛飩」，然後同幫佢手揪住一大袋嘅司機，坐黑色私家車離開。
殷曉靜現年60歲，係河北昌黎人，曾任中央統戰部三局局長，2010年獲國務院任命為中聯辦副主任，過往經常就政改及港獨發聲，例如今年8月曾表明要認清港獨本質。莫非食得雲吞多，作戰力會強好多？