【本報訊】穆迪早前警告若香港與中國關係仍過於緊密，兩年內或遭降主權評級。金管局總裁陳德霖批評，評級機構對內地經濟看法多年來都「冇啱過」，認為香港發展不可能與內地分割。
「用5年、10年、20年睇，嗰啲評級機構都冇啱過，你唔可以唔理事實。雖然話以前錯，將來可能啱，但如果往績唔係咁好，說服力唔高。」陳德霖指，穆迪等大型機構一直對內地經濟擔憂，但他質疑：「目前國際金融風暴震央喺美國，歐債危機喺歐洲，日本增長乏力。其他出口市場經濟增長同以前比係兩回事，你點期望中國增長快呢？」
他續指，今年上半年中國經濟增長保持6%以上，市場對於中國經濟硬着陸、經濟增長跌至3%等的悲觀看法至今「無出現過」，內地無論對香港、亞洲而言，仍然是穩定的經濟增長來源（source of growth）。
「香港係做貿易同金融中介，透過香港做中間人。如果純粹靠700萬人經濟活動，經濟增長同就業唔可能向前發展。」他認為香港經濟以中介活動為主，和內地聯繫一定越來越多，問題在於如何管理風險。「好似紐約好繁盛，你唔會話曼哈頓同美國內陸聯繫頻繁，影響依賴性，所以睇淡佢。」