少爺占、當奴組成的艾粒，前晚在灣仔伊館開騷，獲方力申、連詩雅、美女飛魚歐鎧淳等捧場。兩人又以「五行欠」組合身份唱歌，唱到《香港大河蟹》其中一句歌詞：「偉大嘅領導，希望你連任得到。」阿占就改成：「希望你連任唔到。」觀眾喝采呼歡，其間艾粒興奮得除衫露上身，不過線條欠奉。
艾粒於騷後接受訪問，透露有意再開騷，不過當奴指不會考慮紅館：「入紙三年都唔得，中過一次，但三個月之內就要搞，宣傳都做唔切，最後放棄。」阿占則謂明年想休息，抽時間陪妻兒。當奴笑言開騷前有嘗試減肥：「試過食烚雞，最後放棄，一食飯肚腩即刻標番出嚟，呢啲都係留畀張繼聰做啦！」
採訪：盧妹
攝影：仇志德