這天是國慶日賽馬，落飛黨跑完第三場夠晒興高采烈，事關俾佢哋賭到着啡燈，第三場四班1400米的姚本輝、郭能合作馬「王者再現」，後上一攻而破輕易贏個多馬位，為馬兒開齋，單Win及組合獨贏A3分別派321.5及32元。
現年四歲的新西蘭自購新馬「王者再現」上季尾出道插入四班兩戰冇料到，今季唔使實戰熱身，呢場季內初出即爆大冷取勝，亦成為騎練季內首匹合作頭馬，當中姚本輝連贏四期共取六Win，郭能則一連三戰日行一善。
落飛黨呢場連Q都撈埋，事關「奪冠」配柏寶後上奪得亞軍，與「王者再現」構成的125倍大冷連贏有着啡燈，估計落飛黨扣本後在今場W、Q兩項彩池，合共純利約2,200萬元。今仗三、四名由「世界紀錄」及初出大熱門「龍騰馬躍」順序瓜分，四重彩由四匹後上馬包辦，派彩11萬幾，前置馬統統冇運行。