雷神莫雷拉賽日贏馬係家常便飯，問題在於由邊場開始。這天國慶賽馬日，佢一開波第一場五班1400米，即幫沈集成的「知道勝」開齋，呢匹身價200萬的五歲本地拍賣會馬，曾於前季尾黎海榮被裁定未盡力策騎被重罰，本身久久未開齋，上次由羅理雅跑第三，這天匆出再戰，苦戰至第24仗終於出頭，單Win及組合獨贏A1分別派21及15.5元。
「知道勝」初配雷神首次用放頭戰略，今場恍如變了另一匹馬，大勝兩馬位，而雷神同沈集成都係季初旺人，前者連勝三次賽事，保持停賽期滿復出未斷纜，沈集成則連贏四個賽日，累積七場頭馬進佔練馬師第二位，直逼以九Win領前的蘇偉賢。
今場同時係拍賣馬天下，事關跑第二的「塑料喜」同「知道勝」同樣出自香港國際馬匹拍賣會，分別在於「塑料喜」身價高達700萬，而這條本地拍賣會馬Ｑ，被落飛黨狙擊成功，9.8倍啡燈重注順利得手，落飛黨純利逾1,000萬。三、四名分別為「駕迅」及「金剛秀」，四重彩派2,368元。