香港蘇富比2016年秋季拍賣今日至下星期三舉行，拍賣逾4,000件珍品，總估價逾20億，其中估價超過1億元嘅清代乾隆帝御寶青玉交龍鈕方璽係今次焦點。到底有乜咁巴閉？事關呢個玉璽係乾隆60年禪位、尊為太上皇帝時嘅特製御璽，印文寫住「太上皇帝之寶」，玉璽高11厘米、長12.8厘米、闊12.8厘米，以新疆和闐青玉琢製，玉質質色純美，體積又大，係難得一見嘅靚玉。
另外，現代藝術大師趙無極1954年創作嘅《月光漫步》亦喺拍賣之列，估價達6,000萬。作品配色特殊，以浪漫溫柔嘅色調，好似粉紅、粉綠和黃色等表現夜深同月明嘅意境，非常罕見，係趙無極最早甲骨文系列作品之一。
其他拍賣重點包括中國當代藝術家劉小東1990年創作、估達2,000萬嘅《陽光普照》，同印尼大師阿凡迪（Affandi）1966年創作嘅《裸女臥像》等。