今屆立會怕且都好難有平靜日子喇，除咗多咗主張抗爭嘅議員外，仲可能有一位無論泛民同建制都唔多like嘅梁君彥做主席。不過佢捲入國籍問題，可能做唔成主席。
根據《基本法》第71條，主席要夠40歲、喺香港通常住滿20年、係中國公民同喺冇外國居留權嘅香港永久性居民。梁君彥惟獨冇外國居留權呢點可能出事。因為《基本法》容許部份功能組別議員持外國護照，包括佢所屬嘅工業界（一）。
近排就有人傳梁君彥持外國護照，八方即刻問佢，但佢只係好曖昧咁覆其他傳媒：「如果做得立法會主席，一定要符合《基本法》啦！」即係點？不過如果冇又點會唔答呢？放棄國籍都要時間㗎，萬一佢當選嗰陣都未放棄到，咁就真係大鑊鳥！