張名雅上月初下嫁律師蔡錦豪，戴上30幾對龍鳳𠼦風光出嫁，日前卻爆出開門利是僅得3,800元，引致一對新人在兄弟姊妹WhatsApp群組搵內鬼，之後張名雅澄清開門利是有五位數字，不過有份為她做姊妹的藝人成為嫌疑洩密者。
其中姊妹之一的陳庭欣昨日在鑽石山出席活動，問到內鬼事件，她有備地回答：「喺group裏面冇乜話點討論，佢（張名雅）話知道邊個係內鬼喇，講咗幾句之後，佢講咗句『有緣再聚』，就刪咗個group喇。」陳庭欣指不會猜測誰是內鬼：「總之我知道一定唔係自己，就算真係有呢個人，我相信佢都唔係有心咁樣講嘅。」
「想傷害我哋」
本報又致電另一姊妹唐貝詩，她表示：「知道唔係姊妹團嘅人，嗰日係開心日子，過咗咁耐先講好奇怪，要講都當時即刻講，如果咁唔滿意。我第一次做姊妹，好開心，好感動，係出面人想傷害我哋，點會介意多少，係心意。」
作為當事人的張名雅回覆傳媒表示：「實情唔係3,800元，係五位數！而我亦都好相信我班姊妹。」對於有指她白鴿眼，人紅先派帖，她表示：「如果要請晒有少少難，好似黃心穎有事嚟唔到，但佢有嚟畀人情。胡定欣嗰日生日，都專登嚟畀人情我，絕對唔係乜嘢人紅先請、唔紅唔請囉！」
採訪：王連連
攝影：陳順禎
