乜都唔關佢事嘅特首梁振英，偏偏覺得特首寶座好關佢事。咁12月11日舉行嘅特首選委會選舉，會唔會仲有逾半選委、即係過600票支持佢連任？
同唐唐零交流
世事無奇不有，八方又冇水晶球，當然唔知選委點投，但卻可以從今日起至明年3月26日投票日，幫大家回帶一齊time lies，睇番5年前嘅今日，獲689票嘅CY做過或噏過乜，重溫行騙長官之名係點樣得嚟！
5年前嘅今日，喺政府搞嘅十一酒會，梁振英同勁敵唐英年同場現身但係零交流；明嘅，當時唐唐仲係大熱，CY只係陪跑，難怪唐唐對佢眼尾都唔睄一睄。而CY見到唐唐俾傳媒包圍時，仲疑似葡萄起嚟，專登走到傳媒面前同坐輪椅嘅傷殘人士傾偈，然後又同佢嘅頭號支持者劉夢熊尖啤握手，相信當時大家都估唔到，今日嘅夢熊大師已經同CY反晒面兼坐監咯。
點解會由同陣營變反目，八方都唔再講述，而CY當日受訪時仲預告翌日會辭任行會召集人，又自言組班組得相當順利。記住，當時佢係話順利㗎，結果個班底係點？呢幾年嚟大家有目共睹，單單由十一酒會，已經見證CY嘅語言偽術到家，又難怪4年幾歷練下，偽術更出神入化。