今日開始就係新一屆立法會嘅世界，正式退下火線嘅民主黨主席劉慧卿同何俊仁，噚日各自以自己方式結束最後一日議員生涯。卿姐又回到最初的起點，親手閂上有25年歷史嘅議辦，仁哥就送咗好多啱使啱用嘅嘢畀新丁尹兆堅。
卿姐位於大圍隆亨邨嘅議辦，見證住佢做議員嘅1/4個世紀。噚日嘅交匙儀式雖然冇達官貴人，但嚟得嘅都係跟咗卿姐多年嘅職員、義工同支持者，踏入正午12點，一向守時嘅卿姐就將條匙還番畀房署職員，硬淨嘅佢唔見得傷感，相反仲好興奮咁即刻拉大隊去飲茶。
至於仁哥仲搞鬼，佢將自己部健身單車留畀同佢一樣係肥仔嘅尹兆堅，話「我已經完成我嘅減肥目標，減咗幾磅，𠵱家到你嘞」，亦將好多書好似《論語》、《大英百科全書》等留給阿尹。