【本報訊】麻雀文化博大精深，惟常與賭博拉上關係，難登大雅之堂。最近中大、仁大學生籌備學會研究打麻雀，獲初步註冊的中大麻雀研究學會籌委會擬開班教打牌，並鑽研各地牌規，不涉賭博，冀透過打麻雀打破同學隔膜，「以前一班friend打機變咗一個人打Pokémon Go，希望打牌令同學互相認識！」
辦比賽不涉賭博
中大Secrets（秘密）fb專頁有人提議設學會研究打麻雀，引起資深雀友徐永彥的注意。讀數學系三年級的他幼時陪嫲嫲解悶，4歲已幫手「湊夠4隻腳」，當年仍在學加減數，「麻雀三筒咪三個波，對小朋友嚟講啲圖係幾有趣」，又形容每鋪牌都是有趣數學題。他多與家人竹戰，甚有節制，又指打牌可訓練耐性，「要學揸住爛牌點豁達面對」。
籌委會現有5名委員、約20個創會會員，學會預計11月初正式成立，並招募幹事會希望教會外國交流生打牌並舉辦比賽，強調不涉錢銀賭博，又會與保安協調，以免滋擾他人。
■記者蕭洛汶