有時法國人真是不由你不服，連搞八卦電視節目也高級過人，前天剛剛在第二台開播的《Stupéfiant!》，第一集打頭陣的特別嘉賓，居然是幾乎從來不在這類場合露面的美國建築師Frank Gehry和英國藝術家Anish Kapoor，雖然後者說什麼都不肯正面回應自私自利指控，繼續把最深的黑色Vantablack佔為己有，能夠把通常由演藝名人盤踞的寶貴配額分給養在深閨的文化界，少一點膽識都不行。當然到底要靠電影明星主打，但請來的不是任何一隻當紅炸子雞，而是老到聲都變埋的阿倫狄龍，已經十分出人意表，還別出心裁跑到西西里島當年拍攝《氣蓋山河》的大宅做訪問，老先生又畀足面子，無條件奉獻眼濕濕表情，影迷豈有不樂翻天之理。
那個牙尖嘴利的女主播不知道恃熟賣熟，抑或趁佢病攞佢命，三句唔埋就闖進禁區，一邊揭舊相簿一邊用嬌滴滴的霎戇聲氣問：「當年維斯康堤好鍾意你啊可？」狄先生一聽唯唯諾諾耍太極，專業的她只好使出致命逼供招數：「咩啫，阿漢密保加都話咗你係佢最大嘅情敵咯。」激將法果然奏效，一提起大師那位曾經出書數臭自己的終極男友，向來以壞脾氣見稱的過氣英俊小生立即無名火起，噼嚦啪嘞衝口而出：「嗰條友，響靈堂度高聲疾呼『我係佢老公！我係佢老公！』，簡直離譜到冇朋友！」哇咔咔咔，母狗咬人毋庸擇日，接下來的金句「他愛我又不是我的錯」，卸膊卸得既驕傲又霸氣，放諸情場戰場皆為至理名言，新近獲封「推比人」的梁某，學嘢嘞喂。