朗尼雖然喺曼聯失寵，但無損佢喺英格蘭國家隊嘅地位，皆因暫代領隊修夫基證實朗尼仍然係三獅兵團嘅隊長。
修夫基喺周二接替同英足總解約嘅艾拿迪斯（大儍）而暫掌英軍帥印，下周日就會公佈本月主場對馬耳他同作客鬥斯洛文尼亞嘅世盃外大軍名單；佢仲證實即使朗尼今季喺曼聯打得差兼且最近被貶後備，依然會繼續戴上隊長臂章帶領隊友比賽。另外，大儍喺被炒之前寄咗寫有「我哋用首勝同心協力展開旅程」嘅鼓舞說話畀班國腳，英足總就用呢句說話嚟印製咗4,000件打氣tee，打算送畀嚟緊入溫布萊睇波嘅三獅球迷，但家陣大儍被炒，佢哋惟有銷毀呢4,000件打氣tee，搞到白白唔見咗25,000鎊（約25萬港元）。
大儍落台之後，英足總除咗睇中阿仙奴主帥雲格，仲贒中教過史特加同史浩克04、家陣喺RB萊比錫做緊體育總監嘅韋歷克。韋歷克雖然係德國人，但操得一口流利英語，又喺英國讀過大學，所以先俾英足總相中。