胡杏兒與才俊老公李乘德（Philip）日前拍拖去奧海城看韓片《屍殺列車》，但二人落車後面左左，Philip買完戲飛後會合老婆，二人傾了一分鐘突然吵起來，完全不理途人眼光，後來Philip嬲到發火轉身走，杏兒定神後先識衝落電梯追回老公，最終都𠱁到老公回戲院看戲，不過沒有再交談。胡杏兒昨日傍晚在中環出席化妝品活動，全盤否認戲院吵架事件：「我知你想問乜，係冇啲咁嘅事，我同老公好開心。」
老公留字大罵
明明見Philip一怒之下轉身走，她衝落電梯追老公，胡杏兒對此說：「追老公，冇啲咁嘅事，你哋都知傳媒支筆好厲害，咁樣寫咗就係真。其實嗰日好小事，我想食爆谷，佢叫我唔好食。」雖然杏兒這樣解畫，但當日他兩夫妻一落車已經面黑黑，好像途中已吵嘴。
昨日Philip在Instagram留千言書大罵記者是垃圾，問杏兒是否認同老公看法，會否考慮退出娛樂圈？她說：「佢有佢諗法，每人都有權宣洩不滿，傳媒亦有自己角度寫嘢，但我覺得佢只不過係話狗仔，唔係鬧晒所有記者。做呢一行，你永世都係呢行，我諗好難講到話退出囉！」
莊思敏講定欣
問杏兒老公是否很火爆，之前其座駕幾乎撞到記者，她為夫辯護說：「大家唔好做得咁過份，能互相尊重就冇嘢。」
此外，莊思敏、陳瀅、蘇麗珊和林俊賢女兒林鈺洧等都有出席活動，問莊思敏當年情敵胡定欣被傳與好友陳展鵬相戀，她表示：「有睇新聞，但唔知真定假，下次見到展鵬會問吓佢。」見到定欣會否八卦？她說：「都冇傾過偈，唔會啦！」
採訪：羅慧敏
攝影：陳俊強
