早前自封「抽水冠軍」嘅自由黨榮譽主席田北俊，無論喺香港抑或去到世界各地，都不忘以抽水為己任，噚晚佢又喺fb發功，上載咗一張喺烏茲別克影嘅相，佢喺相中着住當地服飾，戴上綠色頭巾同着住當地服飾嘅女士，笑晒口咁影相留念（圖）。
睇開田少抽水po都知，張相點影唔係重點，重點在句句夭心夭肺嘅留言。今次田少留咗句：「我依家知道點解特首要喺施政報告提『一帶一路』40幾次啦！你哋睇，幾多『機遇』！」仲hashtag「點解條頭巾要係綠色」、「機遇呢D野睇你點睇嘅」、「要講返一帶一路一萬次先得」、「返去實俾個人扭耳仔」。
唔知梁特對田少抽水有咩睇法？唔會發律師信畀佢啩？