數碼通（315）早前公佈6月由靚女「卡后」、前MasterCard香港及澳門區總經理葉安娜（Anna）接替「金句王」黎大鈞做新任總裁，但Anna一直未有同傳媒見過面。去到噚日，Anna終於忙完，第一次出嚟同傳媒食個飯，一開始為公司大打「強心針」，大讚公司團隊執行力強，強調目前管理團隊不變。
被問到今後管理上，佢同前任「強人」黎大鈞有乜唔同，Anna就話，以前管理作風大多「由上而下」，今後就希望下放權力，達至「由下而上」。
佢提到，自己上任3個月，已多次去到前線了解員工工作，包括巡舖、做「街霸」，堂堂總裁仲化身小小嘅CS，聽客戶嘅投訴電話㖭，佢似乎好有決心，一改之前黎大鈞嘅強人作風。
唔少客戶仲搵到Anna嘅email，直接向佢投訴，Anna全部回覆，除了解前線工作之外，亦可以親身接觸顧客，有客人仲同佢做埋「筆友」㖭喎。
Anna有「卡后」之稱，市場之前以為佢由 MasterCard過檔數碼通，將會大搞電子支付，例如推出黎大鈞臨走前留下嘅「KISS」。但Anna就好決絕咁話，公司已擱置「KISS」計劃，暫時亦冇計劃搞電子支付。