鄧梓峰（十郎）因為個樣似卡通人物巴斯光年，一度成為網民熱話對象，日前被讀者楊先生透過本報「爆相爆片」，分享佢捕獲十郎嘅相片。日前下晝3點幾，楊先生喺大坑見到十郎，原來佢約咗大纜都扯唔埋嘅鍾鎮濤（阿B）喺餐廳吹水，楊先生喺電話話：「佢哋傾到好多動作，仲聽到阿B話『好正』㖭。」
唔係普通Band
十郎被馮仁昭問到同阿B係咪好熟？佢話：「平時都係點頭，睇吓溫拿騷嗰啲熟囉，但大半年前朋友話阿B好鍾意The Beatles（披頭四），有機會一齊組band玩，我哋決定搞隊OLD BOYS，雖然我年紀大咗啲，但個心仲係好後生，始終冇人見過我玩band，遲啲我哋喺銅鑼灣HMV開party，表揚吓披頭四嘅歌。」
阿B就話OLD BOYS唔係一隊普通嘅band，係一隊專玩The Beatles歌嘅band：「披頭四係我音樂啟蒙，如果冇咗佢哋，我可能唔會做呢行。」咁溫拿點呀？阿B話：「溫拿係一隊騷band，好少係為興趣，五年玩一次。」咁點解會搵十郎咁樣嘅隊友？阿B話：「我成日聽講佢有彈bass，唱披頭四嘅歌，我哋band仔有句『打band好過打牌』，佢玩披頭四嘅歌頭頭是道，大家都係好瘋狂嘅披頭四迷。」
撰文：馮仁昭