郵儲行（1658）出動埋「超人」李嘉誠都推唔郁股價？
話說長和系主席李嘉誠噚日中午過後發聲明，指佢創辦嘅三個慈善基金會、佢本人與大仔李澤鉅，合共持有郵儲行11.62% H股權益，或全部股本約2.8%。超人視郵儲行為長線投資。
但留意番，超人暫時並冇持有呢批股票，而係透過一間金融機構發行嘅「表現掛鈎票據」（performance linked notes）間接持有。票據價值與郵儲行嘅股價表現掛鈎，究竟條款如何，超人會否換股，街外冇人知。
Anyway，超人高調宣佈，投資一批與郵儲行掛鈎嘅票據，都算係一種支持嘅，話晒郵儲行係今年重磅新股，集資逾500億元，噚日都頂住喺招股價樓上，唔多郁啫。