財政司司長曾俊華噚日喺旅發局主席林建岳陪同下，去咗屯門黃金海岸出席信和集團搞嘅汽車展活動，鬍鬚曾喺台上同岳少碰杯後，即刻同信和集團執董黃永光一齊睇靚車。
近期換咗架紅色凌志嘅財爺，對1954年出產嘅紅色Benz似乎冇乜興趣，反而見到細細架、1954年喺英國出產嘅寶馬BMW Isetta 300，即刻伸手摸吓車身，仲請埋黃永光齊齊上車（圖），兩個大男人示範如何逼爆車廂。
鬍鬚曾離場時，八方問佢有乜感受？佢笑笑口話「好逼」，但亦話「好好玩」。至於問及最近有民調顯示，佢嘅支持度高過佢個波士CY，佢就笑而不語唔回應，坐番紅色凌志走人。