今日係現屆立法會任期嘅最後一日，人民力量陳偉業正式退下火線。唔經唔覺，61歲嘅大嚿喺政圈打滾不下30年，呢次告別議會，唔知適唔適應退休生活，但已經買定機票，同太太享受人生。
大嚿噚日招呼八方同傳媒朋友到立會辦事處話當年兼告別。1985年任荃灣區議員、1986年任區域市政局議員，1991年晉身立法局至今，大嚿經歷回歸前後嘅政治運動；由民協、港同盟、民主黨、社民連再到人力，長時間喺政圈打滾，佢話放下議員身份、放下工作，唔知自己慣唔慣。
寄語新議員重返社區
陳太好體貼，早前已辭職，11月尾回復自由身。兩口子已定好先去加拿大探女，然後去睇北極光，跟住返香港唞唞，有時間就行吓山，明年4、5月再去歐洲，聽落都係逍遙遊。
大嚿話晒都辛苦咗幾十年，𠵱家有時間享受人生都係好事。咪睇佢近年搞議會抗爭，實情佢好多都係由低做起，譬如1995、96年港府要清拆調景嶺寮屋，大嚿幫居民爭取賠償；難怪佢除咗祝新一代嘅議員好運外，仲寄語八個字：「重返社區、研究政策」，否則只會離地、掌握唔到民情民意。
李八方
mailto:[email protected]