華將黎海榮並非名氣騎師，又冇磅減，搵食有幾艱難可想而知，但榮仔今季算好爭氣，已勝出「君臨大地」、「永常喜」兩場頭馬，暫時表現及格有餘。
可能各位練馬師都睇到黎海榮嘅努力，周六國慶日佢獲文家良馬房提供一匹實力座騎，就係第11場二班1200米草地的「嘉福」。四歲的「嘉福」服役7戰得3冠 3亞，咁年輕賽績咁好嘅馬，老實講大把一線騎師爭住騎，唔易落入榮仔手上，尤其上季2月榮仔騎過一次大熱搏失屈居亞軍，難得今次獲重策，榮仔自然高度重視。
好似今朝(29日)榮仔親操「嘉福」後，便特意走進烽火台，向文家良匯報該駒的進度，而榮仔向來好少喺烽火台現身，今朝呢個舉動，擺到明為咗研究「嘉福」嘅搏殺大計。此駒最近試閘跑第二，當日跑第一嘅「喜悅繽紛」已出賽獲勝，可見「嘉福」狀態亦有水準，有力成為榮仔今季第三場頭馬。