前幾日，我求大俠仲同朋友傾，究竟曼城同拜仁慕尼黑呢兩支今季長勝之師邊支會斷纜先，估唔到咁快就有答案：佢哋喺周三歐聯一齊斷！拜仁作客防守力爆燈嘅馬德里體育會輸0:1，曼城就喺三度落後下追平，作客以3:3逼和羅渣士帶領嘅些路迪。
史達寧老烏累藍月失分
喺歐聯C組，羅渣士賽前話呢場絕對唔可以好似上輪俾巴塞隆拿炒七蛋咁醜，佢真係講得出做得到，仲令哥迪奧拿領軍嘅曼城今季首度失分。開波三分鐘，些路迪就憑一次簡單漂亮嘅罰球組織，由穆沙迪比利頭槌開紀錄。曼城雖有費蘭甸奴喺11分鐘追平，但九分鐘後有史達寧擺烏龍，又落後過！不過，呢位英格蘭翼鋒喺28分鐘將功贖罪，幫曼城扳平2:2。換邊後，穆沙迪比利喺47分鐘展現功架，接應傳中一控，再斜身倒掛射成3:2。其後洛尼圖為曼城追平3:3，「藍月」攻勢浪接浪，但都係入唔到多一球，最後兩隊賽和3:3完場，曼城開季10連勝之勢告終。呢場曼城後防表現麻麻，但哥帥賽後都冇乜批評球員，反而大讚球隊，「我好滿意球員喺落後下嘅表現。下半場嘅入波機會多到我都唔記得嘞，我哋本應贏波。」
拜仁老將唔夠跑
至於D組嘅拜仁慕尼黑賽前八連勝，但呢場作客上屆亞軍馬體會仲輸埋。拜仁呢場輸在唔夠快，沙比阿朗素、拿姆同列貝利呢班老將雖然好努力，但喺馬體會嘅快速壓迫節奏下，佢哋都踢得幾辛苦。喺35分鐘，馬體會就靠恩歷克卡拉斯高建功，主場以1:0打破拜仁嘅不敗身。賽後拜仁主帥安察洛堤話喺馬體會身上入波本身就係一件極難嘅事。