盃王大摩今朝（29日）吼實兩匹周六國慶日戰馬於草地跑道出跳，分別是祈普敦試「喜蓮獎星」和郭能操「新力風」，其他賽駒明顯就冇咁嘅鏡頭。
上述兩駒操完之後，大摩都喺機坪仔細睇馬，又向相關騎師問長問短，遲遲唔散水，動態非常緊張，看得出對今戰有志在必得之意。「新力風」跑第8場國慶盃 1000米國際三級賽，此駒有項驚人數據，就係跑直路三級賽三次得兩冠一位，100%上名，最近試閘走勢亦相當好，狀態已谷起，郭能難得重奪帥權，一定搏到盡。
至於吳婉芳愛駒「喜蓮獎星」跑第10場慶典盃1400米國際三級賽，隻馬過去兩戰同程1400米非冠即亞，今仗抽得1檔好位，大摩隨時包辦全日兩項錦標賽。