第五屆立法會議員今日last day，呢屆告別議會嘅議員唔少，包括2004年至今度過12年議會歲月嘅公民黨黨魁梁家傑。飛機師譚文豪喺九東成功接棒後，袋巾不知幾輕鬆，下月會到美國旅行兼探仔，以後專心「重操故業」搵真銀之餘，當然都會繼續關心時政。
至於黨務，或者未必理咁多，皆因公民黨規定，黨魁要由立法會議員擔任，袋巾一退，黨魁一職亦失效，換言之10月公民黨就有新黨魁嘞。該黨執行委員會諮詢下屆立法會黨團意見後，決定推舉新東票王楊岳橋接替袋巾做署理黨魁，10月1日起生效，直至下次周年黨員大會、即係11月19日再正式決定。
八方問過外遊中嘅AY，接任黨魁有乜大計？佢話最緊要有做公僕嘅心態，即係做公民黨嘅「僕人」。嗱嗱嗱，公民黨議員各有取態都幾「馳名」政界，呢個結唔知AY可以點樣解？