大師兄返嚟喇！雖然鄧肯（Tim Duncan）六月宣佈退役，但佢周三就突然現身馬刺訓練營，雖然未知呢位40歲傳奇球星係咪會做教練普波域治（Gregg Popovich） 嘅副手，但相信佢喺新球季會繼續留守聖城！
普帥笑言退役後識駁嘴
普波域治為咗令鄧肯歸隊，都真係盡出奇招，佢之前就話過愛徒再唔蒲頭，每罷工一日就要罰2,500美元（約19,400港元）；不過，鄧肯都係要到訓練營第二日先出現。普帥講笑咁話，鄧肯退役之後越嚟越難管教：「有合同喺身嘅人就梗係要返工啦，但鄧肯就駁嘴話自己仲未簽約；我明明就記得自己同佢有口頭協議，所以都等於簽咗約㗎喇。」
鄧肯喺訓練營都唔止同真路比利（Manu Ginobili）等老友聚舊㗎，今夏由魔術來投嘅中鋒迪蒙（Dewayne Dedmon）就話：「佢話我喺防守嗰陣要同隊友多啲溝通，我下次練波會照做㗎喇。」馬刺主將尼納特（Kawhi Leonard）就話鄧肯退役後，自己要承擔更多責任，仲要同阿域治（LaMarcus Aldridge）帶領球隊爭冠。