馬匹開齋接踵而來，這晚谷草一開場五班1650米，就有苗禮德馬房「萬醒仔」，由史卓豐居中後上搏殺得手，七歲自購馬苦戰到23場終獲在港首捷，單Win及組合獨贏A1分別派61.5及25.5元。
「萬醒仔」今場內檔起步沿途貼欄冇蝕位，守在第六位左右，直路沿欄直上，力壓於外叠後追甚勁的董事馬「野外桃源」，「萬醒仔」第三季在港出賽卒之開齋，史卓豐則是連續第三日賽日贏馬冇斷纜。今次亦係史卓豐季內首度勝出苗廐馬，苗禮德亦一連兩次賽事有馬贏。
反觀馬會董事利子厚名下的「野外桃源」姍姍來遲影相飲恨做阿二，三、四名分別由「哈哈笑」及「掌握時機」取得，四重彩派四萬二千蚊多啲。利子厚這晚另一駒第二場「百戰百勝」因尿液涉違禁物質退出，相當冇運。
苗禮德指剛暑假時「萬醒仔」馬主方中曾表示不如讓牠退役，馬兒搏極都未出頭，但練者回應牠應有一Win在手，請馬主暫時保留，很高興今仗終於贏馬交代。苗禮德表示「萬醒仔」弱點是太有個性，太過聰明，當現場環境稍有令牠不高興，牠就不願跑，前仗谷草跑第三，上仗再出卻令人失望，今場可能現場環境啱mood，令牠開心舒暢，便交出水準。