如無意外，到咗今年11月，新一屆特首戰已經有眉目，到底邊啲建制派入閘、泛民係咪放棄陪跑，相信到時好清楚。而選戰進入關鍵時刻之際，特區有朋自遠方來，前港督彭定康會喺11月26日出席公民實踐培育基金舉行嘅「香港管治：禮崩樂壞？」講座。
同場嘅講者同肥彭一樣咁有份量，包括「積極監察」特首梁振英嘅民建聯曾鈺成、GEMS Limited非執行主席及長江實業地產獨立非執行董事馬世民（Simon Murray）以及港大校長馬斐森，4位重量級人士屆時暢談公共、企業同大學管治之道，到底香港點樣走出當下危機？換特首又係咪時機？如果想睇佢哋字字珠璣，記住提早買飛。詳情可參閱網站 http://www.projectcitizens.hk/zh-hant 。