本地騎師這晚快活谷開場後一直捱打冇贏過馬，跑到第六場三班1800米終於吐氣揚眉，吳嘉晉與何澤堯分策告東尼馬房「開心駿馬」及方嘉柏馬房「瑰麗傳奇」一放一追，結果呢對華將師兄弟攜手包辦20倍連贏位。
當中「開心駿馬」綠燈落飛得手，在吳嘉晉胯下1檔起步由頭放到尾贏四分三馬位，單Win及組合獨贏A1，分別派56及25.5元，吳嘉晉在師傅告東尼支持下，終於敲響個人今季勝鼓。
跑第二是大熱門首戰谷草的「瑰麗傳奇」，這匹身價1,300萬名駒，在兩位女藝人翻版「舒淇」陳芷尤及阮兒入場為馬主文壽強打氣下雖屈居亞軍，但表現已是在港最佳一仗。今場「康樂神駒」賽前一度有巨額過關，結果後上跑第三，第四名由潘頓、大摩合作馬「蓮花巨星」拎到，四重彩派三萬二千幾。三T正獎有人中，每注派73萬幾。
今場霍利時馬房「新妙星」終點前拋下史卓豐，騎師冇事，但馬兒則看來重創。