噚日嘅其中一節迎新營活動，邀請咗民主黨劉慧卿同民建聯葉國謙兩名資深議員向新丁分享經驗，但26人中只有10人出席，當中8個係建制派，另外兩個就係陳沛然同鄺俊宇。有乜貼士畀新人？卿姐話加入委員會前應按個人能力同興趣，更炮轟缺席嘅新丁：「有啲報咗名都冇嚟，唔知咩人嚟！我覺得真係好有問題！」在席嘅周浩鼎忍唔住笑，卿姐就話：「你喺度笑？第日就我笑你嘞！」
劉皇發囝囝、人稱發仔嘅劉業強就係捧場者之一，卿姐上前同佢握手，慰問發叔病況，原來卿姐幾個月前想探發叔，但發仔話唔係好方便，所以冇去，呢日趁機慰問。
發仔就話發叔喺屋企休息緊，身體狀況冇乜嘢，但早前感染過肺炎，𠵱家慢慢康復中，「佢好番，但唔係好放心畀人去探佢」。