橫洲風暴上兩星期炒得火熱，不過偉大特首嚟一個「粒粒皆辛苦」嘅哽咽，加上香港人三分鐘熱度嘅性格，相信都係不了了之，香港大河蟹。後續仍然有笑話，好似爆炸頭鄉紳講到原居民權益嚟自南京條約，不過小弟真係想講，阿爆炸頭鄉紳，點解你又唔落去搵慈禧太后同李鴻章傾？特首亦繼續佢A字膊個格，包括賴香港土地不足，係前朝遺留落嚟嘅問題。
車路士上仗以0:3慘敗畀阿仙奴，已經聯賽兩連敗，開季三連勝嘅威風蕩然無存，領隊干地又係唔係應該賴落摩連奴遺留落嚟嘅問題？車路士老化，特別係後防線，其實上任領隊摩連奴都面對過，佢都決心放棄過泰利，重用葛特蘇馬等較年輕一代。
不過，干地過去帶意甲冠軍祖雲達斯同意大利國家隊，都擅長令老將保持勇態，特別係意軍喺今屆歐國盃嘅後防表現，由老牌門將保方，以至「BBC」巴沙利、邦路斯同基亞連尼，都有老來嬌之感，但點解干地嚟到車仔就打唔起一批老將？特別伊雲洛域同加利卡希爾（左）更加對阿仙奴一戰錯漏百出。
講真油王阿巴今夏都唔係唔畀錢干地花喎，回購大衛雷斯同向費倫收購左閘馬高斯阿朗素，都用咗超過5,000萬鎊，奇在阿朗素不受重用，雷斯過去喺車仔已有輕出毛病，喺巴黎聖日耳門浸淫後都冇改善，連帶較後生嘅門將泰拔高圖爾斯都打到患得患失。
打油王工一向唔易，干地已經聞到魷魚香，據報佢都準備一月轉會市場重開後大換血，不過車仔整體鬥心不足嘅問題，係唔係換一、兩個後防就解決到？
文：牽牛