超低息環境下，城中唔少名人富豪爭相入市買豪宅保值，繼早前蕭若元父子齊掃貨，著名建築商鄧鏡波外孫女黃双如亦出擊入市。
土地註冊處最新資料顯示，灣仔星域軒1座高層F單位最近以3,300萬元成交，單位實用面積901方呎，呎價3.66萬元，買家登記Wong Sheung Yu Belinda個名同鄧鏡波外孫女黃双如相同，估計係同一人。
黃双如識飲識食仲識煮，出過多本食譜，一道荷葉飯用上法國鵝油與西班牙老樹橄欖油，佢2001年喺中環開設高級雜貨店「有食緣」，最出名係店內嘅花膠牆，可惜因租金同成本上升，黃双如舊年初已經將雜貨店結業，之後保持低調。
估唔到黃双如除咗對飲食有研究，亦會投資物業。星域軒位於金鐘至灣仔一帶商業核心區，一向受本地同外籍人士追捧，樓盤由太古地產（1972）興建，落成17年，有兩幢住宅，一層6伙，高層擁有後方茂密綠化景，同時可望前方商廈景，環境旺中帶靜，幾分鐘到金鐘，樓下星街又有唔少星級食肆。
據講星域軒嘅租金相當唔錯，實用呎租達到60至70元。如果黃双如買入單位作收租之用，估計一個月可以收租6萬幾銀，大約有兩厘幾yield。
李華華
mailto:[email protected]