立法會非建制陣營噚日喺選舉過後首度於大樓內聚頭，唔少人之前去咗旅遊唞一唞，包括喺港島區險勝嘅公民黨陳淑莊Tanya，佢去咗阿根廷兩星期，近日先返港，隨即為立法會新一屆工作做好準備。
充電後嘅Tanya一身白裙現身，精神煥發，頭髮亦由藍紫變咗綠色，可能係甩色之故。
Tanya見到相熟戰友時相當hyper，包括喺平權問題上共同進退嘅人力慢必陳志全，即時嚟個熱情擁抱，隔籬嘅民主黨黃碧雲好似被嚇親咁。
慣咗一條友旅行嘅Tanya話喺阿根廷喪食，揀地方醫肚好多時都係憑直覺；雖然唔多認得邊啲係本地人，但跟大圍搵食點都有個譜，大牌檔式都冇問題，啤酒當然係必備，笑稱自己好麻甩。雖則喪食但冇因此暴肥，唔知有乜keep fit秘技？