特首選戰開始聽到鑼鼓聲，梁振英似乎準備好一起起步，坊間就等緊政務司司長林鄭月娥與財爺曾俊華表態，財爺與梁特近期差不多日日現身公開活動，林鄭就唔見影，俾人使咗去德國參加貿發局舉辦嘅大型推廣香港活動。
今次林鄭會去法蘭克福與杜塞爾多夫訪問5日，唔知係咪最近食得花生多，噚日開幕禮，佢心情好靚，向在場德國嘉賓力sell香港之餘，仲係咁數德國有乜好玩。
素有「奶媽」之稱嘅林鄭特別提到，自己同唔少女士一樣，最鍾意去outlet濕平，仲特別推介法蘭克福附近嘅Outlet City Metzingen。不過，奶媽當然唔係省油的燈，你以為佢真係想講shopping？查實佢緊接想晒自己份CV攞分。
點解林鄭好似咁熟德國？原來係因為想當年，佢仲係駐倫敦經濟貿易辦事處處長時，由於倫敦辦事處太忙，而德國係香港最大嘅歐洲貿易夥伴，所以佢主動建議喺拍林開多一個辦事處，講完，𠱁到在場一眾德國嘉賓不知幾開心。