9.28對唔少港人嚟講，別有一番滋味在心頭，尤其因為傘運而晉身立法會嘅新議員，包括直言「冇傘運就冇臻議員」嘅社福界邵家臻。臻議員噚日朝都有出席立法會迎新活動，佢話由於唔知啲會係咪閉門，所以開會時好謹慎，連喊露都唔多敢打；重視私隱嘅佢更做足防洩措施，特別用咗防止被偷睇嘅手機貼，免個人資料外洩。
噚日係9.28傘運兩周年，曾任傘運大台主持嘅邵家臻，特別帶埋當時個鼓開會（圖），除咗為傍晚集會做準備，亦希望會前影相紀念呢個議會第一次，原來呢個鼓陪佢度過成個傘運，每逢上台發言前，佢都會先打鼓召集群眾，所以覺得好有紀念價值；即使有人建議佢不如攞去拍賣佢都唔捨得，「因為對我嚟講太重要嘞」。