車路士喺九月忽然沉咗落嚟，聯賽一和兩負，其中上輪喺半場就被阿仙奴打殘，以三球大敗，但小弟覺得應該畀多啲時間領隊干地（圖），因為車路士嘅爛攤子真係有排執，既有上季遺留嘅信心問題，亦有一啲拖咗好耐嘅頑疾。
網民叫摩連奴做Daddy，而叫干地做啲咩？都幾似個譯音，就係干爹。Daddy上季搞到車仔護級，季中由軒迪克接手，最後得聯賽第10！要知道曼聯最沉、由莫耶斯帶嗰季都係第七，所以車仔呢個爛攤子其實仲衰過曼聯。
干爹開季已經做得唔錯，至少夏薩特同迪亞高哥斯達有番信心，入波返番嚟，但點解後防係咁失波呢？
呢個就係結構性問題，拖咗好多年，由迪馬堤奧同賓尼迪斯年代起，泰利已經出現老態，但接班問題拖吓拖吓，見Daddy激活到泰利一季，又繼續拖，到家陣伊雲洛域同加利卡希爾都唔掂，全線崩潰，尼高路簡迪再勁都救唔到條防線。
干爹喺轉會窗關閉前買咗大衛雷斯同馬高斯阿朗素，佢哋嚟咗都未夠一個月，都要等佢哋融入球隊；同埋呢次俾阿仙奴炒鑊甘，干爹要棄用班老嘢嘅阻力就少咗好多，等睇佢重用位置靈活嘅馬高斯阿朗素。睇番干爹教祖雲達斯嘅第一季，前七場聯賽都跌跌撞撞，得三勝四和，成日和波，之後先漸入佳境，同埋開始用左閘基亞連尼踢中堅，轉踢三中堅嘅陣式。希望經歷咗咁多年英超嘅起與跌，阿巴莫域治可以畀啲耐性干地，唔通下個月又搵軒迪克嚟頂半季咩！
文：咖喱