馬匹屢拼不逞無法向馬主交代，練馬師唔心急就假。好似沈集成馬房的「知道勝」，前季煞科日配黎海榮，全程以「文靜」騎法發揮，咁都跑個第三，睇到馬迷眼冤，結果黎海榮亦被裁定未盡全力，停賽14個賽日。
「知道勝」馬主都算唔話得，仍默默支持沈集成，但上季跑足一季，隻馬三度得亞軍，始終未能打開勝門，到今季「知道勝」又搏輸收場，上仗季內初出，在羅理雅胯下後上力拼，可惜輸條頸僅得第三。
23戰不勝的「知道勝」將於國慶日再戰五班1400米，馬主失望咗咁多次，沈集成話冇壓力就假，適逢羅理雅停賽，有乜辦法取得突破？其實好簡單，咪搵雷神莫雷拉囉，「知道勝」今朝(28日)已由雷神過檔，唔係話雷神初騎一定贏，但起碼可以反映到沈集成的誠意及決心，馬迷就算不賭都值得睇睇雷神點跑。