今年最重磅新股郵儲銀行（1658）認真夠「飛士」，噚日掛牌，本港主要財金官員齊到賀，包括甚少到上市儀式嘅財爺曾俊華，仲有財庫局局長陳家強、證監會主席唐家成，當然唔少得港交所（388）主席周松崗與行政總裁李小加喇，如此陣容，實屬少見。
雖然話特首選戰就快開波，財爺呼聲甚高，但佢暫時冇乜動靜，有人估佢好快辭職準備參選，又好似未有聲氣，佢亦如常心情勁靚咁出席活動，不過要埋身問兩句就有些少難度，好似噚日朝早，佢都係握手、影相、寒暄等指定動作，傳媒提問就笑而不語。
講番集資576億元嘅郵儲行，佢哋送畀港交所嘅紀念品，毫無懸念係郵票！