馬匹打破悶局，經常帶挈埋練馬師或騎師開齋。這晚谷草第四場五班1200米，殯儀大王蕭志成名下六歲馬「明多多」配郭能取得轉投高伯新(Gibson，喼神)馬房後首捷，單Win及組合獨贏A1分別派83.5及24.5元，連帶高伯新苦戰至新馬季第六次賽事，終於打開馬房勝利之門，
「明多多」出道初期一直由蔡約翰訓練，於四班及三班田草1200米各贏過一次，上季初轉至高伯新麾下，表現一直恢復唔到，卒之淪落到最低班賽事。上次本月7日季內初出跑五班谷草1200米配郭能得第三，這晚匆出班次、路程、配搭一切照舊，結果居中後上一攻而破贏個多馬位，轉廐後首度取勝，可謂重獲新生。
今場末段「明多多」向外斜出，令居其外側的後上馬「全勝姿態」一度須收慢，後駒最終後追不及屈居亞軍，幫唔到落飛黨命中綠燈Win，三、四名分別為「天狼星」及「大將風速」，四重彩派一萬二千幾。
高伯新指「明多多」來投時許多傷患，一步一步搞番好隻馬，練者強調整個馬房運作正常，之前搏殺手風欠順，欠點運氣，希望開齋後手風轉順。