星展香港近期頻頻用社交媒體做宣傳，今次仲踩埋《100毛》場，拍咗段名叫「今期流行男朋友」嘅片，片名係由古天樂兩首經典名曲組成，一如所料，古仔有份參與拍攝，介入專家Dickson同黃慘盈嘅戀情，遺憾嘅係，古仔冇高歌一曲。
呢條短短5分鐘嘅片，講述一個動人嘅愛情故事，話說Dickson張信用卡積分過咗期換唔到機票，搞到佢同飾演佢女友嘅黃慘盈去唔到歐洲睇畫，仲釀成愛情危機㖭。
跟住古仔就出現，以黃慘盈小學同學身份挽救呢段戀情，個方法就係教Dickson以後用DBS Black Card換DBS Dollar，臨尾Dickson仲高歌一曲《男朋友》，好聽到呢。
聽聞，今次星展同《100毛》只係一次性合作，因為覺得呢個平台嘅noise夠勁。條片短短半日已經逾50萬點擊率，證明家陣做廣告唔可以咁死板，有諗頭就有回響。