周二歐聯分組賽，兩支英超球隊齊齊煲魚生粥，E組熱刺嘅南韓前鋒孫興民繼續大勇，入波幫球隊作客莫斯科中央陸軍小勝1:0，打開今屆歐聯勝利之門；李城喺英超戰績麻麻，嚟到歐聯就非常醒神，主場1:0贏波圖，喺G組兩戰全勝未失一球。
孫興民五場入五粒
熱刺喺首輪歐聯分組賽搬去溫布萊做主場失威輸波，而前鋒哈利卡尼呢排亦養緊傷，不過領隊普捷天奴都唔使愁，呢期有興民係咁入波。佢喺上周六英超梅開二度帶領熱刺贏米杜士堡後，到周二喺歐聯踢到71分鐘打破悶局，接應拉美拿直傳射入，今季上陣五場入五球。
仲有一個好消息，卡尼嘅養傷時間冇早前預計嘅兩個月咁耐，有機會趕及喺11月初對阿仙奴嘅英超大戰候命。普捷天奴賽後話：「我哋喺呢場波表現唔錯，最重要係顯示咗除卡尼之外，陣中仲有其他球員有入球能力。」
興民威威，但另一支英超球隊李斯特城嘅亞洲球員就冇乜機會發揮，所講嘅就係嚟自日本嘅前鋒岡崎慎司。
李城靠波圖殺手奠勝
李城喺周二上演球會歷史性首場歐聯主場比賽，雖然有唔少日本球迷專程嚟捧同胞岡崎慎司場，但可惜佢全場齋坐冷板。而喺呢場波攞晒彩嘅，係喺上半場25分鐘建功奠勝嘅「波圖殺手」施利文尼。
呢位前鋒以往效力士砵亭以成日攻破波圖大門見稱，今年之前三次對波圖已經入五球；加盟李城後上陣四場入三球，效率唔比興民差。
另一位李城前鋒占美華迪喺今季嘅表現無疑沉咗少少，佢喺自己本自傳透露，喺12年因為腳傷，曾經無聊試過將伏特加溝「彩虹糖」嚟飲，之後俾體能教練鬧佢咁樣對肌肉會有傷害。
