喺特首梁振英同財政司司長曾俊華鬥得難分難解之際，同樣被視為有機會入閘跑馬仔嘅政務司司長林鄭月娥，無佢哋咁好氣，繼續英國倫敦嘅訪問行程，同當地政府高官、商界同基建界代表會面。
大家冇睇錯，的確係基建界，皆因林鄭對基建發展都好上心，其間出席咗香港駐倫敦經濟貿易辦事處及英國土木工程師學會合辦嘅酒會，向英國基建界介紹香港最新基建發展。酒會前佢仲同英國土木工程師學會副主席馬賢雅勳爵教授會面，以名譽資深會員身份喺學會名譽資深會員名冊上簽名㖭。
查實林鄭係喺2013年獲頒此榮銜，表彰佢出任發展局局長時對土地、物業及建築業界發展嘅貢獻。咦，土地同建築等項目，都係梁振英嘅自覺超卓範疇，林鄭喺呢方面都咁出眾，一旦真係同CY一齊入閘，似乎喺呢方面都唔輸蝕喎。
見財政大臣傾一帶一路
林鄭此行亦同英國財政大臣夏文達會面，就共同關注議題交換意見，包括一帶一路策略同金融科技發展，佢仲感謝夏文達過去擔任英國外交及聯邦事務大臣時，支持香港和英國加強聯繫。