Sell嘢嚟講，傳統廣告已經唔奏效。星展香港今年初開始用微電影宣傳銀行服務，前排出咗第4集，特別請咗藝人王敏德做奸角。
今集內容好簡單，男主角飾演banker，有日佢嘅前女友大住個肚去銀行搵佢，話俾賤男拋棄咗，只係拎到一筆錢養活兒子，佢希望利用呢筆錢透過P2P平台投資，因保證回報15厘，男主角儍更更覺得諗得過。
佢同事兼女朋友就覺得事情唔合理，一查之下，發現平台係龐氏騙局，最終拉咗平台創辦人，佢前女友筆錢得以相安無事，結局就係男主角愧疚之下遞辭職信，其實成個故事主要想講星展幾咁審慎啫！
星展話，劇情係由真實個案改編，曾經真係有位客人希望投資一個內地P2P貸款平台，當時市值接近76億美元，結果發現係龐氏騙局。星展當然唔透露係邊個P2P平台，大家自己估喇。
星展噚日就舉行一場傳媒首映會，仲有爆谷、可樂、台灣肉腸招待，睇戲一樣。
