第二屆深港設計雙年展月中開幕，主辦單位喺上環荷李活道設計咗「Design Walk」路線，唔同嘅畫廊、小店輪流舉辦工作坊，等市民同遊客認識本土文化。
設計展教沖靚茶
喺上環開咗68年的公利真料竹蔗水同本港設計師Mike合作，幫蔗汁樽換新衫，掛張懷舊嘅紙製卡片落樽身。Mike話以前嘅涼茶舖會播懷舊老歌，係一代人嘅集體回憶，新設計嘅紙卡上面有QR code，用手機掃描就可以重溫舊歌，邊飲蔗汁邊懷舊。
荷李活道嘅茶店文博軒會喺10月舉辦學茶、泡茶工作坊。負責人Candy話要沖一杯中式靚茶，需要洗杯、洗茶壺、洗茶葉，全個過程成10幾分鐘，希望藉工作坊教識港人寧靜身心，忙裏偷閒。