「做人冇公關，食屎㗎啦。」呢句子華神名句，越來越多人知道字字有血有淚。出名手腕高強嘅港鐵（066）主席馬時亨年頭走馬上任，坦白話港鐵喺公關方面好有改進空間。
馬時亨接受會計師公會刊物《A Plus》訪問，未正式上任已經留意到港鐵喺對內、對外溝通都需要改進，尤其港鐵咁大集團，淨係計香港員工已超過1.7萬人，每日載客550萬人次，一定要同公眾保持溝通，所以特登請來出身政府嘅工總前總裁蘇家碧（Linda）做公司事務總監。
不過咁，作為每日搭港鐵返工放工嘅市民，未必會因為一兩幅佻脫嘅「精靈訓練員注意安全」海報就收貨，港鐵都係做好fundamental，解決繁忙時間壞車、訊號故障等問題喇，趕返工打蛇餅等車，見到你張海報話99.9%準時率，真係火都嚟㗎。