中國女排喺郎平領導下，重奪奧運冠軍令人回味，郎平嘅身價亦因此水漲船高，就連恒大（3333）都出手抽水，請郎平做旗下恒大人壽代言人。
恒大冇透露郎平嘅代言價，但人壽嘅官方微信就指，雙方早有淵源，因郎平當年離任美國國家隊後，喺2009年獲邀任教恒大女排，年薪達500萬人仔。恒大又好大方，喺國家隊陷入低谷時，未完約已經畀郎平重返國家隊喎。
故事係賺人熱淚嘅，但講到恒大女排就慘喇，5年前成立時好風光，仲同家陣嘅恒大淘寶足球一樣，好鍾意大手筆簽國際球星。但郎平一走，恒大女排冇晒聲氣，唔知今次會唔會趁機搵郎平再指點下呢？
講開又講，恒大淘寶足球舊年底喺新三板上市，當時集資逾8億人仔，公司公佈，到本月6號已使淨約841蚊人仔。上市未夠一年已用晒啲錢，下次請球星點算好呢？