40歲的陳少霞今年7月再婚，嫁給有中港「法拉利之父」之稱的李文輝，昨晚於山光道馬會補擺婚宴，張文慈及黎燕珊到賀。晚上7時左右，一對新人接受傳媒訪問，穿紫色旗袍的少霞表示婚宴期間不會換衫，問她何時去度蜜月，她說：「遲啲先，啱啱喺意大利返嚟！」
陳少霞昨日眼有淚光，問她是否好感動？她表示：「係呀，好感動呀！」至於可有造人大計，她則謂交予神安排。笑問她老公送了多少卡戒指？少霞本來笑說要賣關子，但李文輝即插嘴說：「幾卡啦！最緊要佢鍾意。」
問陳少霞可有通知劉德華，她表示：「有通知到，多謝晒所有人啦！」問二人子女送了甚麼禮物？少霞甜笑謂：「佢哋送咗愛畀我哋。」陳少霞好姊妹黎曉靈則說：「本來一班朋友想打隻金豬，寫住『多子之母』，但少霞話好老套，所以改送珍珠，寓意佢係上帝手上嘅掌上明珠。」
採訪：曹家誠
攝影：沈健程
