《大公報》近日接連報道本土民主前線，繼周一以頭版刊登本民前幕後底細嘅報道，話時代醫療集團股東兼董事周俊健係創辦人之後，噚日就指控網台創辦人蕭若元係幕後金主，蕭若元嘅囝囝蕭定一就話有關報道係抹黑。
指抹黑冇政治常識
《大公報》話周俊健名下嘅時代醫療，幕後老闆馮懿卿創辦嘅「鐳射企業」，今年8月被蕭若元持大股嘅中國3D數碼娛樂所收購，質疑馮、蕭係本民前幕後「金主」喎。
蕭定一就話呀，父親蕭若元2012年立法會選舉時已釐清同佢嘅業務關係，父親雖然擁有20%股權，但無控制性地位，過去4年絕無過問佢嘅業務，兩人喺商業業務上已經分家。佢強調蕭若元唔支持港獨或勇武派行動，曾經喺網上多次批評本民前，若將蕭若元視為撐港獨派，係純粹抹黑同缺乏政治常識。