熱普城喺啱啱過咗嘅立法會選舉，只有鄭松泰（圖）喺新界西攞到一席，泰博噚日接受電台訪問時多次提到議會內「得自己一個」，坦承「係有少少孤單」，之但係佢又強調一個人都有優勢，「就係冇政黨聯繫包袱、有彈性」，可以就個別議題同其他議員合作或作斡旋協調工作。
泰博自爆請咗公民黨岳少楊岳橋食檸檬，拒絕對方邀請佢出席同非建制陣營嘅定期飯敍。佢強調唔係唔願交朋友，自稱「我個人好nice（友善）㗎」，但指唔需要為相同而團結。
對於五區公投承諾，佢話熱普城選舉未如理想，「得我一個冇辦法做到五區變相公投」，強調目標係「全民制憲」。咁係咪走數？佢話「我都其實想實現」，若有五名同道人進入議會，樂意推動，但暫時未有信心說服其他人推五區公投，「大家嘅焦點𠵱家都喺橫洲」。